تبْردعَتْ الخَيْلْ
جورنال أنفو
تبْردعَتْ الخَيْلْ
*مريم معاد
ما هي بلاد ما هي سما
النجوم فيها سابت ودلاّت فالما
والݣَمرة عماتْ
وضَوْها غلباتو الظلمة
الشتا عْݣرات ورْبابْها جَابو لبّاهُمْ مرا
ولاّت من جديد ضُرة
توحْمات وتوجْعَات
ولدات يتاما مقطوعين من شجرة
هي مولات القْصُور
ماها مايسخن وشعيرها مايفُورْ
وجَمرتها حمرة ومشات تزور
وتبردعْتْ الخيل
و تسَرْجت الحمير والبغال بقات دور
قالو شكون زطاط القافلة
قالو داك الشيفور
حجّامك اوليدي طاح فالبير
والادهم تهرس واللجام قصير
واليهودي الى بغا يسلم
كيف يدير
وبين الجامع والجامع صومعة
والفقيه ما يودن غير بالجمعة
واليتيم تفݣعْ من الدمعة
و الجيعان مات على شبعة
ماهي بلاد ماهي خيمة الوسخ
ݣاعها خَزّزْ وللي داز يقول يخ
يخ منها دار يخ منها بلاد
والمعمشة فسطحها فالقمل ترضخ
والمعفونة راجلها دبح وهي
فظهر البكمة تسلخ
وللي قال شكون مول هَمّو
يطلع لصومعة ويبان لييه ولد عمو
وللي بغا يعرف البكمة
يقلب المرايا ويشوف دمو
والشعير المفور ماه من سمو
و ماهي بلاد ماهي قُبة الريح
حَرݣُو القمح وزرعو الشيح
والشُّوم جمع العݣَارب
تحت الضَّرݣَة
والكرمة صبح حليبها ݣِيح
*مريم معاد كاتبة وزجّالة